ရမ်ခမ်ဟန် ရဲ့ လမ်းဟောင်းလေး

ရမ်ခမ်ဟန် ရဲ့ လမ်းဟောင်းလေး

ရင်ထဲကစကား
သူ့နားမှာ မခါးရအောင်
စာလေးတွေက ဆင့်ဆိုလို့
ဖွင့်ဆိုတဲ့
ငါ့ရင်ခွင်ကို သူ မမြင်ရင်လည်း
ရမ်ခမ်ဟန် ရဲ့ လမ်းဟောင်းလေးက
“သူ့ကို သက်သေခေါ်ပါ” တဲ့

ငါ့အသည်းတွေ
ကွဲကြေပါလေပြီ
လေရူးတွေမြူး
စိတ်ကူးတွေ လှိုင်းကြမ်းလို့လူးတဲ့အလား
ထိုင်ကာဆွေး
ငိုင်ကာ ငေးနေရတဲ့ ငါ့အဖြစ်ကို
ရမ်ခမ်ဟန် ရဲ့ လမ်းဟောင်းလေးက
“တစ်နေ့တော့ သူပြန်လာမှာပါ” တဲ့

ကိုတိုး

ဒါကတော့ ရမ်ခမ်ဟန် အားကစားကွင်းထဲက ကျွန်တော် သွားထိုင်နေကြ ကျောက်တုန်းလေးပေါ်မှာ အလွမ်းတွေပိုမိရင်း ရေးစပ်ခဲ့တဲ့ ကဗျာလေးတစ်ခုပါ။

မခင်နှင်းဆီ

မခင်နှင်းဆီ

မူးဝေလို့ခြွေမယ့်လူတွေအတွက်
ဆူးတွေနဲ့ဝေတဲ့
မင်းရဲ့ အလှက
ငါ့ အတွက်တော့
ရင်မောစရာပါ ..

အချိန်မလွန်
ညှိုးမစွန်းသေးတဲ့
မင်းရဲ့ ဘ၀ကို
ဆူးတွေနဲ့ဆိုလည်း
ငါ လက်လှမ်းမှီချင်ပါသေးတယ်

ကိုတိုး

ကျွန်တော်နှင့်သူငယ်ချင်းများ (၇)

“သားလေးမွေးရင် ကိုယ့်နာမည်ပေးပါ” .... “သားလေးမွေးရင် ကိုယ့်နာမည်ပေးလိုက်ပါ” ဆိုတဲ့ အဆိုတော် လွှမ်းမိုး သီချင်းကို ကိုတိုးတို့ သူငယ်ချင်းတွေ ဗိုက်ကြီးသယ်တွေ မြင်တိုင်း အမြဲတမ်းလိုလို ဆိုတတ်ကျပါတယ်။ ဟိုးအရင် တက္ကသိုလ်ကျောင်းသားဘ၀က ဗိုက်တကားကားနဲ့ အတန်းဖော် တစ်ယောက် သူ့ ယောင်္ကျားနဲ့ ကျောင်းခန်းထဲဝင်လာတုန်း စစနောက်နောက် ဆိုလိုက်မိလို့ သူ့ယောင်္ကျားက ဒေါသမီးတွေ ဟုန်းဟုန်းတောက်နေတဲ့ အကြည့်နဲ့ ကြည့်သွားပါလေရဲ့ ဗျာ။ လမ်းသွားရင်းလည်း ဗိုက်ကြီးသည်တွေ မြင်တိုင်း စစနောက်နောက် ဆိုတတ်ကျသေးပါတယ်။ တစ်ခါတုန်းကတော့ “ရှင့်နာမည်သာပြောပါ .. ကျွန်မသာ သားလေးမွေးရင် ရှင့်နာမည် ပေးလိုက်ပါ့မယ်” လို့ အာကြမ်းကြမ်းနဲ့ လာသရမ်းသွားတဲ့ မမဗိုက်ကြီးသည် ရဲ့ မထင်မှတ်တဲ့ အပြုအမူကြောင့် အာစေးစွာ ငိုင်ငေးသွားသူက ကျွန်တော်ပါ။ အူကြောင်ကြောင်နိုင်လှတဲ့ ကျွန်တော်ကလည်း “ဟုတ် .. ဟုတ် .. ကျွန်တော့်နာမည် ကိုတိုး ပါ ခင်ဗျာ” လို့ ဖြေလိုက်မိတာက သူငယ်ချင်းတွေကြားမှာ ဟာသတောင် မြှောက်ခဲ့ပါတယ်။

တစ်ခါတလေကျတော့လည်း ဒီလို စ ကျပါသေးတယ်။ ဥပမာ အတွဲ နှစ်ယောက် ကျွန်တော့်တို့ အရှေ့ဖြတ်လျှောက်သွားလို့ကတော့ .. “မင်း မောင့်ကို အရွဲ့တိုက်ပြီး ဒီကောင်နဲ့ တွဲပြတာပေါ့လေ ... ရပါတယ် ကွာ ... ရပါတယ် ...” တို့၊ “မင်းအတွက် ကိုယ် သိပ်စိုးရိမ်တယ်ကွာ” တို့ ဆိုပြီး မကြားတကြား တိုးတီးစွာ ရိုက်ကွင်းထဲများ ရောက်နေတဲ့ ရုပ်ရှင်မင်းသားဆန်ဆန် ငိုတော့မယ့် အသံလေးနဲ့ ခပ်တည်တည် နဲ့ ပြောတတ်ကျပါသေးတယ်။ ထိုသို့သောအချိန်မျိုးမှာတော့ စောင်းကန်း စောင်းကန်းနဲ့ “ဒီကောင် ငါ့ရည်းစားရဲ့ အရင် ဟိုဟာ လား” ဆိုတဲ့ သံသဃ မျက်လုံးတွေနဲ့ ထိုဘဲတွေ ငနဲတွေက ကြည့်သွားလို့ကတော့ .... သူတို့ကို နောက်ကနေကြည့်ရင်း ကျိတ်ရယ် တတ်ကျတဲ့ သူတွေဟာ တခြား ဘယ်သူမှ မဟုတ်ပါဘူး .... ကျွန်တော်နဲ့ ကျွန်တော့် သူငယ်ချင်းတွေပါပဲ ဗျာ။

ဒါပေမယ့် အခုအချိန်မှာတော့ ဒီလို ဟာသ လုပ်တတ်တဲ့ ကျွန်တော့်ရဲ့ အမူအကျင့်တွေနဲ့ အပြောလေးတွေကို နှုတ်က မထွက်နိုင်အောင်ကို အာစေးနေမိတာက အမှန်ပါ။

ဒီ အကြောင်းလေးကို ပြန်ပြောင်းအောင်းမေ့စွာ ရေးနေခိုက် “သားလေးမွေးရင် ကိုယ့်နာမည်ပေးပါ” .... “သားလေးမွေးရင် ကိုယ့်နာမည်ပေးလိုက်ပါ” လို့ တိုးတီးစွာရေရွတ်ရင်း

ကိုတိုး

ဒီလိုလည်း ဖြစ်တတ်ပါတယ်

ဟိုးတစ်လောက နေ့ခင်းကြောင်တောင် အားကစားလုပ်ပြီး ဗိုက်ဆာဆာနဲ့ အလှမ်းမဝေးလှတဲ့ အိမ်နားက ကုလားဆိုင်တစ်ဆိုင်မှာသွားစားဖြစ်တယ်။ အိမ်နားမှာတော့ ထိုင်း၊ မြန်မာ၊ တရုပ်၊ ကုလားဆိုင်တွေကတော့ ပေါမှပေါ။

ဒါနဲ့ ဆိုင်လည်းရောက်တော့ ဗိုက်ဆာဆာနဲ့ Dosa (မြန်မာအခေါ် “တိုရှည်”) ခြောက်ချပ် .. ကြက်ကီးမား ၁ ပွဲ၊ အာလူးဟင်း တစ်ပွဲ စားပြီး ဒိန်ချည် ၂ ခွက် ဆင့်သောက်ရော။ (ပြောမယ့်သာပြောတာ ထည့်ပေးတာတွေက နည်းနေတော့ အာတောင် ကောင်းကောင်း မဆွတ်ရှာဘူး၊ ဟင်းတွေကလည်း အရောင်တင်မှုန့်တွေဘယ်လောက်များထည့် ထားသလဲလို့မပြောတော့ပါဘူး ဘုန်းကြီးသင်္ကန်းတွေများ ထည့်ချက်ထားလား အောင့်မေ့ရတယ်) ဒါနဲ့ သူငယ်ချင်းတစ်ယောက်ကို ဆိုင်ရှေ့မှာတွေ့တော့ သူ့ပါခေါ်ပြီး ဒိန်ချည်သောက်မလား ငါပေးပါ့မယ် လို့ပြောပြီး ဆိုင်ထဲခေါ်လိုက်တယ်။ နောက်တော့ ဆိုင်ထဲမှာ သူနဲ့ “ကိုယ့်ကိုယ်ကို အားကိုးရေးနဲ့ မည်သူ့မှ အားမကိုးရေး” အစရှိတဲ့ အကြောင်းအရာတွေကို စီစာပတ်ကုံး စာစီကုံးသကဲ့သို့ ကျွန်တော်က စပြောတယ်။

နောက် ပိုက်ဆံရှင်းမယ် လုပ်တော့ ပိုက်ဆံအိပ်က ပါမလားဘူး။ ဒါနဲ့ သူငယ်ချင်းကို မင်းမှာပါရင် ခဏလောက်ဆိုက်ပြီးပေးလိုက်ပါ ငါနောက်မင်းဆီချက်ချင်းလာပေးပါ့မယ်လို့ ပြောတာနဲ့ သူက ပိုက်ဆံထုပ်ပြီးရှင်းလိုက်တယ်။ သေပါလေရော ..... သူကတော့ ကျွန်တော့်ရဲ့ “ကိုယ့်ကိုယ်ကို အားကိုးရေးနဲ့ မည်သူ့မှ အားမကိုးရေး” ခေါင်းစဉ်နဲ့ ဟောပြောသွားတာတွေကိုတော့ ဘယ်လိုမြင်မလဲ ဗျာ ..

ဒီလိုလည်း ဖြစ်တတ်ပါတယ်

ကိုတိုး